दौंडाईचा : येथील पोलीस स्टेशनच्या डी.बी. पथकाने अत्यंत तत्परता दाखवत जुने कोळदे येथील महादेव मंदिरातील दानपेटी चोरीचा गुन्हा अवघ्या २४ तासांच्या आत उघडकीस आणला आहे. पोलिसांनी आरोपीला अटक करून त्याच्याकडून चोरीला गेलेला मुद्देमाल हस्तगत केला आहे.
घटनेचा थरार आणि तक्रार
मिळालेल्या माहितीनुसार, शिंदखेडा तालुक्यातील जुने कोळदे येथील वर्णेश्वर महादेव मंदिरात दि. २० फेब्रुवारी रोजी सायंकाळी ७ ते २१ फेब्रुवारीच्या पहाटे ५ वाजेच्या दरम्यान चोरी झाली होती. चोरट्याने मंदिराची दानपेटी फोडून त्यातील रोख रक्कम आणि सोन्याचे दागिने लंपास केले होते. याप्रकरणी हरसिंग गुलाबसिंग गिरासे यांनी दौंडाईचा पोलीस ठाण्यात फिर्याद दिली होती.
तपासाची चक्रे अन् सीसीटीव्ही फुटेज
गुन्हा दाखल होताच पोलीस निरीक्षक दिनेश सोनवणे यांनी तातडीने तपासासाठी डी.बी. पथकाला आदेश दिले. पथकाने मंदिरातील सीसीटीव्ही फुटेजची कसून तपासणी केली असता, त्यात एक संशयित व्यक्ती दिसून आली. मिळालेल्या माहितीच्या आधारे पोलिसांनी साहुरी शिवारातील नानाभाऊ गिरासे यांच्या शेतात शोध घेतला असता, तिथे ऊस तोडणीचे काम करणारा एक संशयित मिळून आला.
मुका असल्याने भावामार्फत उलगडा
संशयित आरोपी मुका असल्याने तपासात सुरुवातीला अडथळे आले. मात्र, पोलिसांनी त्याचा चुलत भाऊ राजेश पुनक्या पवार याच्या मध्यस्थीने चौकशी केली असता, त्याने आपले नाव मुक्या कांतीलाल पवार (वय ४०, रा. अजनाळे, ता. जि. धुळे) असल्याचे सांगितले. अधिक चौकशीत त्याने गुन्ह्याची कबुली दिली आणि ऊस तोडणी सुरू असलेल्या शेतातील झोपडीत लपवून ठेवलेला मुद्देमाल पोलिसांच्या स्वाधीन केला.
हस्तगत केलेला मुद्देमाल
पोलिसांनी आरोपीकडून एकूण २३,०५०/- रुपये किमतीचा मुद्देमाल जप्त केला आहे, ज्यामध्ये खालील बाबींचा समावेश आहे:
५००, २००, १००, ५०, २० आणि १० रुपयांच्या विविध चलनी नोटा (एकूण १९,०५०/- रुपये).
सुमारे १ ग्रॅम वजनाचा सोन्याचा तुकडा (किंमत ४,०००/- रुपये).
पोलीस पथकाचे कौतुक
ही उल्लेखनीय कामगिरी पोलीस अधीक्षक श्री. श्रीकांत धिवरे, अप्पर पोलीस अधीक्षक श्री. अजय देवरे, आणि उपविभागीय पोलीस अधिकारी श्री. सुनिल गोसावी यांच्या मार्गदर्शनाखाली पोलीस निरीक्षक दिनेश सोनवणे, पोसई इमरान खान, पोहेकॉ रवींद्र गिरासे, पोकों हिरालाल सुर्यवंशी, प्रविण निकुंभे आणि चापोहेकॉ नरेश मंगळे यांच्या पथकाने केली. या तपासाचा पुढील तपास पोसई इमरान खान करत आहेत.
