महापालिका प्रशासनाच्या ‘डुलकी’मुळे नागरिकांचा तीव्र संताप
धुळे : धुळे महानगरपालिका हद्दीतील साक्री रोड परिसरातील भीमनगर भागात आज एका खासगी वायफाय कंपनीच्या निष्काळजीपणामुळे पिण्याच्या पाण्याची मुख्य जलवाहिनी फुटल्याची गंभीर घटना घडली. या घटनेमुळे हजारो लिटर पिण्याचे पाणी वाया गेले असून, पाण्याचा वेग इतका प्रचंड होता की परिसरातील अनेक दुकानांमध्ये पाणी शिरून मोठे नुकसान झाले आहे. विशेष म्हणजे, घटनेला दोन तास उलटूनही महापालिकेचा एकही अधिकारी किंवा कर्मचारी फिरकला नसल्याने स्थानिकांनी संताप व्यक्त केला आहे.
नेमकी घटना काय..?
मिळालेल्या माहितीनुसार, भीमनगर परिसरात एका खासगी कंपनीकडून अंडरग्राउंड वायफाय केबल टाकण्याचे काम युद्धपातळीवर सुरू आहे. यासाठी वापरण्यात येत असलेल्या मोठ्या मशीनने खोदकाम करत असताना जमिनीखालील मुख्य जलवाहिनीला जोरदार धडक दिली. यामुळे पाईपलाईन फुटून पाण्याचे उंच कारंजे उडू लागले. बघता बघता संपूर्ण रस्ता जलमय झाला.
नागरिकांचा आक्रोश आणि प्रशासनाचे दुर्लक्ष
पाईपलाईन फुटल्याने पिण्याच्या पाण्याचा अपव्यय होत असल्याचे पाहून स्थानिक नागरिकांनी तातडीने महानगरपालिकेच्या पाणीपुरवठा विभागाच्या अभियंत्यांना फोनद्वारे संपर्क साधला. मात्र, वारंवार कॉल करूनही प्रशासनाकडून कोणताही प्रतिसाद मिळाला नाही. तब्बल दोन तास उलटूनही घटनास्थळी महापालिकेचा एकही जबाबदार अधिकारी किंवा दुरुस्ती पथक हजर झाले नव्हते. यामुळे संतप्त झालेल्या नागरिकांनी महापालिका प्रशासनाच्या कारभारावर जोरदार ताशेरे ओढले.
नुकसानीचा पाढा
पाण्याची नासाडी: दोन तासांपासून सुरू असलेल्या गळतीमुळे हजारो लिटर शुद्ध पाणी गटारात वाहून गेले.
व्यापाऱ्यांचे नुकसान: रस्त्यावरील पाण्याचा प्रवाह दुकानांमध्ये शिरल्याने व्यापाऱ्यांच्या मालाचे नुकसान झाले आहे.रस्त्याची दुरवस्था: पाण्याच्या प्रवाहामुळे नुकत्याच तयार झालेल्या रस्त्याचेही मोठ्या प्रमाणावर नुकसान झाले आहे.
