धुळे येथील गुरुद्वारा हिंसाचार आणि अडवणूक प्रकरणी अटकेत असलेला मुख्य आरोपी रणबीरसिंग सुखदेवसिंग खालसा याच्या अडचणीत मोठी वाढ झाली आहे. पोलिसांनी केलेल्या तपासात आरोपीच्या गुरुद्वारातील निवासातून मोठ्या प्रमाणात जिवंत काडतुसे आणि मॅगझिन जप्त करण्यात आले असून, याप्रकरणी त्याच्यावर शस्त्र अधिनियमांतर्गत नवीन गुन्हा दाखल करण्यात आला आहे.
तपासणीत जिवंत काडतुसांचा साठा हस्तगत
मिळालेल्या माहितीनुसार, ५ जानेवारी २०२६ रोजी घडलेल्या हिंसाचार प्रकरणी रणबीरसिंग खालसा सध्या न्यायालयीन कोठडीत (जेलमध्ये) आहे. पोलिसांनी त्याच्या गुरुद्वारातील घराची झडती घेतली असता, पोलिसांना धक्कादायक पुरावे मिळाले आहेत. यामध्ये:
८ एमएम (KF): ८ जिवंत गोळ्या (एसएलआर रायफलसारख्या दिसणाऱ्या).
.४५ एमएम (HPM): ३५ जिवंत पिस्तूल काडतुसे.
मॅगझिन: दोन रिकामे मॅगझिन.
या बेकायदेशीर शस्त्रसाठ्याप्रकरणी आरोपीवर शस्त्र अधिनियम कलम ३/२५ अन्वये नवीन गुन्हा नोंदवण्यात आला आहे. या गुन्ह्यात तपास करण्यासाठी त्याला पुन्हा जेलमधून ताब्यात (अटक) घेतले जाणार आहे.
धार्मिक भावना दुखावल्याप्रकरणी अतिरिक्त कलम
धुळे शहर पोलीस ठाण्यात दाखल असलेल्या गुन्हा रजि. नं. ०३/२०२६ (BNS कलम १२६(२), ३५१(२), (३)) मध्ये आता भारतीय न्याय संहिता (BNS) कलम २९९ ची वाढ करण्यात आली आहे. हे कलम कोणत्याही वर्गाच्या धार्मिक श्रद्धांचा अपमान करण्याच्या हेतूने केलेल्या द्वेषपूर्ण कृत्यांशी संबंधित आहे. या कलमांतर्गत देखील आरोपीला पुन्हा अटक करण्याची प्रक्रिया पोलीस राबवणार आहेत.
तडीपारी आणि कडक प्रतिबंधात्मक कारवाईची तयारी
आरोपीच्या गुन्हेगारी कारवायांची दखल घेत पोलीस प्रशासनाने अधिक कडक पावले उचलली आहेत:
१. तडीपारी: आरोपीविरुद्ध तडीपारीचा प्रस्ताव उपविभागीय दंडाधिकारी (SDM) यांच्याकडे पाठवण्यात येणार आहे.
२. १२९ BNSS: शांतता भंग होऊ नये यासाठी १२९ BNSS अंतर्गत कारवाईचा प्रस्ताव अप्पर पोलीस अधीक्षकांकडे सादर केला जाणार आहे.
पोलीस प्रशासनाचा इशारा: शहरातील शांतता आणि धार्मिक सलोखा बिघडवणाऱ्या कोणत्याही कृत्याची गय केली जाणार नाही. या प्रकरणाचा सखोल तपास सुरू असून अन्य कोणाचा सहभाग आहे का, याचाही शोध घेतला जात आहे.
