बारामती : महाराष्ट्राच्या राजकारणाला हादरवून सोडणारी अत्यंत दुर्दैवी घटना आज सकाळी बारामती येथे घडली. बारामती विमानतळावर लँडिंगदरम्यान झालेल्या भीषण विमान अपघातात राज्याचे उपमुख्यमंत्री अजित पवार यांच्यासह ६ जणांचा जागीच मृत्यू झाला आहे. आगामी जिल्हा परिषद निवडणुकीच्या पार्श्वभूमीवर दौऱ्यावर असतानाच काळाने त्यांच्यावर घाला घातल्याने संपूर्ण महाराष्ट्र सुन्न झाला आहे.
नेमकी दुर्घटना काय?
मिळालेल्या प्राथमिक माहितीनुसार, अजित पवार हे मुंबईहून बारामतीसाठी निघाले होते. सकाळी त्यांचे विमान बारामती विमानतळावर लँडिंग करत असताना तांत्रिक बिघाडामुळे किंवा अन्य कारणास्तव धावपट्टीवर न उतरता शेजारील शेतात कोसळले. जमिनीवर आदळताच विमानाने पेट घेतला आणि काही क्षणातच आगीचा भडका उडाला. हा अपघात इतका भीषण होता की विमानातील कोणालाही वाचवण्याची संधी मिळाली नाही.
अपघातातील मृतांची माहिती
या दुर्घटनेत एकूण ६ जणांचा मृत्यू झाल्याची माहिती समोर आली आहे. यामध्ये:
उपमुख्यमंत्री अजित पवार
त्यांचे स्वीय सहायक (PA)
सुरक्षा रक्षक (PSO)
सेवक
दोन वैमानिक (पायलट इन कमांड आणि फर्स्ट ऑफिसर)
या सर्वांचा घटनास्थळीच मृत्यू झाल्याचा दावा सूत्रांनी केला आहे.
निवडणूक दौऱ्यादरम्यान काळाचा घाला
आगामी जिल्हा परिषद निवडणुकांचे वारे राज्यात वाहत आहेत. याच पार्श्वभूमीवर अजित पवार बुधवारी बारामती दौऱ्यावर होते. आज दिवसभरात त्यांच्या चार महत्त्वाच्या सभा नियोजित होत्या. आपल्या बालेकिल्ल्यात मतदारांशी संवाद साधण्यासाठी ते उत्साहाने येत असतानाच हा दुर्दैवी अपघात घडला.
घटनास्थळी जनसागर आणि आक्रोश
विमान कोसळल्याचा आवाज होताच विमानतळाजवळील शेतकरी आणि नागरिकांनी मदतीसाठी धाव घेतली. प्रशासकीय यंत्रणा, अग्निशमन दल आणि पोलीस तातडीने घटनास्थळी दाखल झाले. मात्र, तोपर्यंत आगीने रौद्र रूप धारण केले होते. ही बातमी वाऱ्यासारखी पसरताच राष्ट्रवादी काँग्रेसचे कार्यकर्ते आणि पदाधिकाऱ्यांनी बारामतीकडे धाव घेतली. घटनास्थळी जमलेल्या हजारो कार्यकर्त्यांच्या आक्रोशाने वातावरण शोकाकुल झाले आहे.
राजकीय क्षेत्राला मोठा धक्का
अजित पवार यांच्या निधनाचे वृत्त समजताच राज्याच्या राजकीय वर्तुळात मोठी पोकळी निर्माण झाली आहे. एक रोखठोक, स्पष्टवक्ता आणि कार्यक्षम नेता राज्याने गमावला असल्याची भावना व्यक्त होत आहे. पवार कुटुंबीयांवर कोसळलेल्या या आघातामुळे बारामतीसह संपूर्ण राज्य हळहळ व्यक्त करत आहे.
