धुळे (प्रतिनिधी):येथील जयहिंद एज्युकेशन सोसायटीच्या झुलाल भिलाजीराव पाटील (झेड. बी. पाटील) महाविद्यालयात आज जिल्हास्तरीय ‘आविष्कार’ संशोधन स्पर्धा मोठ्या उत्साहात संपन्न झाली. या संशोधन महोत्सवाला धुळे जिल्ह्यातील विद्यार्थ्यांनी उत्स्फूर्त प्रतिसाद दिला असून, तब्बल १६५० विद्यार्थी संशोधकांनी यात आपला सहभाग नोंदवला.
कवयित्री बहिणाबाई चौधरी उत्तर महाराष्ट्र विद्यापीठातर्फे आयोजित करण्यात येणाऱ्या या ‘आविष्कार’ स्पर्धेचे आयोजन झेड. बी. पाटील महाविद्यालयाच्या प्रांगणात करण्यात आले होते. या स्पर्धेसाठी धुळे जिल्ह्यातील सर्व तालुके, तसेच जिल्ह्यातील विविध महाविद्यालये आणि शाळांमधील विद्यार्थ्यांनी मोठ्या संख्येने हजेरी लावली. विद्यार्थ्यांनी विज्ञानासह विविध विषयांवर आधारित आपली संशोधने आणि मॉडेल्स सादर केले.
निवड प्रक्रियेचे टप्पे:
यावेळी माहिती देताना स्पर्धेचे जिल्हास्तरीय समन्वयक महाले सर म्हणाले की, “विद्यार्थ्यांमधील संशोधन वृत्तीला चालना देणे हा या स्पर्धेचा मुख्य उद्देश आहे. आज पार पडलेली स्पर्धा ही ‘फेज वन’ (Phase 1) म्हणजेच जिल्हास्तरीय आहे. यातून उत्कृष्ट ठरलेल्या विद्यार्थ्यांची निवड ‘फेज टू’ (Phase 2) साठी म्हणजेच विद्यापीठ स्तरीय आविष्कार स्पर्धेसाठी केली जाईल. विद्यापीठ स्तरावर यश संपादन करणारे विद्यार्थी पुढे राज्यस्तरीय (State Level) आविष्कार स्पर्धेत विद्यापीठाचे प्रतिनिधित्व करतील.”
आज महाविद्यालयाच्या आवारात विद्यार्थ्यांची मोठी गर्दी दिसून आली. विविध विषयांवरील नाविन्यपूर्ण प्रकल्प आणि विद्यार्थ्यांचा उत्साह यामुळे संपूर्ण परिसर विज्ञानमय झाला होता. स्पर्धेच्या यशस्वीतेसाठी महाविद्यालयाचे प्राचार्य, प्राध्यापक वृंद आणि शिक्षकेतर कर्मचारी यांनी परिश्रम घेतले.
