धुळे: नुकत्याच पार पडलेल्या धुळे महानगरपालिका निवडणुकीचे निकाल जाहीर झाले असून, यात भारतीय जनता पक्षाने (BJP) अभूतपूर्व यश संपादन केले आहे. एकीकडे भाजपने विजयाचा जल्लोष सुरू केला असताना, दुसरीकडे शहरात खासदार असूनही काँग्रेसला खातेही उघडता आले नाही, हा या निवडणुकीचा सर्वात मोठा धक्का मानला जात आहे.
आमदार अनुप अग्रवाल यांचे सूक्ष्म नियोजन
भाजपच्या या प्रचंड विजयाचे श्रेय आमदार अनुप अग्रवाल यांच्या कुशल नेतृत्वाला दिले जात आहे. त्यांनी या निवडणुकीत राबविलेली यंत्रणा आणि रणनीती अत्यंत अनोखी ठरली. केवळ तिकीट वाटप न करता, आमदार अग्रवाल यांनी सर्व उमेदवारांच्या विजयाची वैयक्तिक जबाबदारी स्वीकारली होती. बूथ रचनेपासून ते प्रचार नियोजनापर्यंत त्यांनी लक्ष घातले, ज्यामुळे भाजपला हे ऐतिहासिक यश मिळाले आहे.
खासदार असूनही काँग्रेस ‘झिरो’वर
दुसरीकडे, काँग्रेससाठी ही निवडणूक अत्यंत नामुष्कीची ठरली आहे. धुळ्यात काँग्रेसचे खासदार विद्यमान असतानाही महापालिकेत पक्षाचा एकही उमेदवार निवडून येऊ शकला नाही. प्रचारातील नियोजनाचा अभाव, नेत्यांमधील विसंवाद आणि मैदानात नसलेली ‘स्ट्रॉंग यंत्रणा’ यामुळे काँग्रेसला या पराभवाचा सामना करावा लागल्याचे चित्र आहे. खासदारांच्या माध्यमातून अपेक्षित प्रचार न झाल्याने मतदारांनी काँग्रेसकडे पाठ फिरवल्याचे बोलले जात आहे.
विरोधकांचे आरोप आणि इतर पक्षांची स्थिती
निवडणूक प्रचारादरम्यान शिवसेना, राष्ट्रवादी काँग्रेस, एमआयएम (MIM) आणि अपक्षांनी भाजपवर आणि त्यांच्या कार्यपद्धतीवर अनेक गंभीर आरोप केले होते. असे असूनही, या पक्षांनी आपापल्या बालेकिल्ल्यात काही जागा राखत विजय मिळवला आहे. मात्र, काँग्रेसच्या संपूर्ण पडझडीमुळे विरोधी गटाचे गणित काहीसे कोलमडले आहे.सध्या धुळे शहरात भाजपची ‘हायटेक’ निवडणूक यंत्रणा आणि काँग्रेसला मिळालेला ‘भोपळा’ यावरच चौकाचौकात जोरदार चर्चा रंगली आहे.
